La maniere d'abiter & faire generation

L'homme estant couché avec sa compagne & espouse, la doibt mignarder & esmouvoir (si elle ne l'estoit) la baisant, & parlant du jeu des dames Rabattues, en luy maniant les tetins, & les parties genitalles, affin qu'elle prenne volonté & apestit d'abiter, & que les deux semences se puissent rencontrer ensemble, car aucunes femmes ne sont pas si promptes à ce jeu que les hommes : & pour encore advancer la besoigne, la femme fera une fomentation d'herbes chauldes cuittes en bon vin et malvoisie, à ses parties genitalles, & mettra pareillement dedans le col de sa matrice ung peu de muscq & civette, & lors qu'elle sentira estre esguillonnee & esmeüe, le dira à son mary : adonc se joindront ensemble, & accopliront leur jeu doucement, atendant l'un l'autre, faisant plaisir à son compaignon, & quand les deux semences seront jettees, l'homme ne doibt promptement se desjoindre & descendre, à fin que l'air n'entre en la matrice, & n'altere les semences, & quelles se mixionnent mieux l'une avec l'aultre :  & subit que l'homme sera descendu, la femme se doibt tenir coy, & croiser & joindre les cuisses & jambes, & qu'elle ne parle, ne tousse, n'y esternue, & qu'ellle dorme promptement apres si luy est possible.